Month: June 2025

Il-Prim Ministru Robert Abela, akkumpanjat mill-Ministru għal Għawdex u l-Ippjanar Clint Camilleri u l-Ministru għas-Saħħa u l-Anzjanità Attiva Jo Etienne Abela, żar iċ-Ċentru ta’ Servizzi għat-Tfal, Adolexxenti u Żgħażagħ fir-Rabat Għawdex.

Dan iċ-ċentru modern joffri firxa ta’ servizzi mediċi u terapewtiċi għat-tfal, adeloxxenti u żgħażagħ, fosthom occupational therapy, fiżjoterapija, speech therapy, psikjatrija tat-tfal u l-adolexxenti, kif ukoll servizzi ġodda bħal dental hygienist edukattiv, pedjatrija tal-komunità u terapija tal-familja.

Minn dan iċ-ċentru, li jinsab viċin tal-Isptar Ġenerali ta’ Għawdex, qed jibbenefikaw madwar 300 tifel u tifla flimkien mal-familji tagħhom.

Waqt din iż-żjara l-Prim Ministru kellu l-opportunità jiltaqa’ ma’ diversi familji li kienu qed jagħmlu użu minn dan is-servizz.

Il-Prim Ministru Robert Abela rringrazzja lit-tim tal-professjonisti li qed joffru dan is-servizz essenzjali f’ambjent adattat u inklussiv.

Huwa saħaq fuq l-importanza ta’ servizzi li jqiegħdu lit-tfal u l-familji tagħhom fiċ-ċentru tal-kura, u li jkunu aċċessibbli wkoll għall-komunità Għawdxija.

Dan iċ-ċentru jikkumplimenta l-viżjoni tal-Gvern li joffri kura integrata u sostenibbli, inkluż f’Għawdex, fejn qed isir investiment kontinwu fil-faċilitajiet tas-saħħa u fil-kapaċità tal-professjonisti tas-settur.

Malta rnexxielha tattira lejha din il-Masterclass dinjija fejn l-aqwa professjonisti nġabru jiskambjaw l-ideat

F’indirizz li għamel hekk kif f’pajjiżna qed titlaqqa’ ‘The International Advanced Endoscopy Masterclass’, il-Prim Ministru Robert Abela tenna l-impenn tal-Gvern Malti favur eċċellenza fis-settur tas-saħħa, ir-riċerka u l-edukazzjoni medika. Il-Prim Ministru nnota kif din it-tip ta’ konferenza mill-aqwa professjonisti fil-qasam tal-endoskopija ġiet f’pajjiżna għall-ewwel darba u bis-saħħa tagħha qed isir skambju ta’ ideat. Hawn innota l-irwol tal-Ministeru għas-Saħħa u l-Anzjanità Attiva flimkien mal-Awtorità Maltija għat-Turiżmu biex inġabet din il-konferenza f’pajjiżna.

Il-Prim Ministru spjega l-investiment li kompla jsir f’pajjiżna biex il-pazjenti jibqgħu jirċievu servizz tas-saħħa ta’ kwalità. Innota kif pajjiżna introduċa dik imsejħa bħala endoscopic submucosal dissection. Teknika li biha l-intervent endoskopiku ikun aktar preċiż u jagħti l-opportunità għal trattament li jkun invażiv mill-inqas. Dr Abela qal ukoll li sala oħra għall-endoskopija fetħet fl-isptar Mater Dei biex jingħata aktar servizz lill-pazjenti.

Il-Prim Ministru Robert Abela qal li din il-konferenza medika se tagħti opportunità biex pajjiżna jkun ċentru t’eċċellenza fis-saħħa fir-reġjun tal-Mediterran. Irringrazzja wkoll b’mod partikolari u fost oħrajn lill-Professur Edward Despott, Malti rinomat barra minn pajjiżna u li anki qed jagħti s-servizzi tiegħu fl-isptar Mater Dei. Il-Professur Despott kien strumentali biex l-AEM inġabet f’pajjiżna.

Il-Ministru għas-Saħħa u l-Anzjanità Attiva Jo Etienne Abela wera s-sodisfazzjon kbir tiegħu u tal-Ministeru li kungress ta’ din il-kwalità u mill-aktar għolja qed iseħħ f’pajjiżna. Huwa għamel aċċenn għall-espansjoni fis-servizzi tal-endoskopija f’Mater Dei li fl-aħħar sena ingaġġat lil professur Edward Despott li qed joffri servizzi ta’ ESD u double balloon enteroscopy. Dan huwa livell ta’ kura li jiġi klassifikat mal-aqwa fid-dinja. “Bis-sehem tal-Gvern u fl-organizazzjoni ta’ dan il-kungress qed jibbenefikaw, it-tobba u l-infermiera li joffru servizz f’Malta qed jiġu mħarrġa bl-aħjar mod biex iċ-ċittadini Maltin u Għawdxin jirċievu kura tal-ogħla livell,” temm jgħid il-Ministru Jo Etienne Abela.

Min-naħa tiegħu, il-Kap Eżekuttiv tal-MTA Carlo Micallef qal li l-istrateġija tal-Awtorità Maltija għat-Turiżmu hija favur turiżmu ta’ kwalità u jrendi bħala parti wkoll mill-viżjoni Malta 2050. Fisser kif konferenzi u expos tal-kalibru tal-Masterclass AEM li qed issir f’pajjiżna f’dawn il-jiem jagħtu dak il-valur miżjud fl-ekonomija tagħna.

Il-Prim Ministru Robert Abela inawgura l-priority guest terminal li għadu kif ġie rranġat fl-Ajruport Internazzjonali ta’ Malta, proġett ambizzjuż b’investiment ta’ €4.5 miljun li beda fl-2024.

Din il-faċilità mill-aktar avvanzata tixhed l-impenn ta’ Malta lejn turiżmu innovattiv, ta’ kwalità għolja u li jgħolli l-istatus tal-pajjiż bħala destinazzjoni mill-aktar importanti għal konnettività globali. It-terminal fih ħames suites privati fl-ewwel sular, li kapaċi jakkomodaw sa 34 passiġġier fl-istess ħin. Mil-lat ta’ estetika, il-lounge area tutilizza ħġieġ u dawl naturali biex tnaqqas id-dipendenza fuq illuminazzjoni artifiċjali filwaqt li ttejjeb l-ispazju għall-passiġġiera. L-offerti kulinari jiffukaw fuq il-prodotti staġjonali u lokali, servuti minn kok iddedikat f’żewġ kċejjen biex iwassal esperjenza gastronomika friska u awtentika. Fl-2024, dan il-qasam fis-settur tal-ospitalità kkontribwixxa €6.6 miljun għad-dħul tal-ajruport.

Il-Prim Ministru Robert Abela qal li dan it-terminal jirrifletti l-valuri ewlenin ta’ pajjiżna: il-kwalità fuq il-kwantità u s-servizz li għandu l-għeruq tiegħu fl-ospitalità Maltija. “Hija wkoll parti minn viżjoni usa’, il-Viżjoni Malta 2050 fejn it-turiżmu ta’ valur għoli u l-konnettività globali mhumiex biss aspirazzjonijiet, iżda prinċipji ewlenin”, saħaq Dr Abela. Qal li filwaqt li llum qed niffokaw fuq dan l-ispazju, irridu nirriflettu wkoll fuq l-irwol tal-ajruport kollu kemm hu. “L-ajruport ta’ Malta huwa wieħed strateġiku u huwa parti vitali mill-istorja nazzjonali tagħna,” qal il-Prim Ministru Robert Abela.

Nhar il-Ħamis 3 ta’ Lulju, fil-Palazz tal-Girgenti, se tittella’ edizzjoni oħra ta’ ‘A Night at the Palace’ f’dak li se jkun spettaklu mużikali b’differenza għal għan nobbli. 

L-Orkestra Filarmonika ta’ Malta taħt id-direzzjoni tal-Maestro Aurelio Belli, flimkien mal-kantanti Amber, Richard Edwards u Gloriana Arpa Belli, se jwasslu lill-udjenza l-iktar mużika sinonima mal-films u musicals rinomati fosthom Titanic, Gladiator, Skyfall, The Lion King u ħafna iktar.

Waqt konferenza tal-aħbarijiet fl-Uffiċċju tal-Prim Ministru, li matulha ngħataw id-dettalji tal-attività, mart il-Prim Ministru Dr Lydia Abela spjegat kif din is-sena d-donazzjonijiet miġbura minn dawk preżenti se jmorru b’risq proġett ta’ Special Olympics Malta fil-qasam tas-saħħa mentali. Preċiżament biex jiġi msaħħaħ il-programm ‘Strong Minds’ li huwa għodda ta’ tagħlim li jiżviluppa ħiliet ġodda biex l-atleti jadattaw għal ċirkostanzi differenti li jiltaqgħu magħhom.

Dr Abela qalet li l-kompetizzjonijiet sportivi spiss jirrikjedu li l-atleti jagħmlu ħafna ħin ’il bogħod mid-dar u mill-pajjiż, u dan jista’ jikkawża stress mentali. L-istess, fil-ħajja ta’ kuljum fejn l-atleti bħal kull wieħed minnha jistgħu jgħaddu minn perjodi ta’ ansjetà.

Bid-donazzjonijiet li se jinġabru waqt ‘A Night at the Palace’, Special Olympics Malta se tkun tista’ toffri iktar mezzi, fosthom screening tas-saħħa mentali tal-atleti biex ikun hemm sistema iktar robusta li tidentifika riskji fi stadju kmieni u allura kura fil-komunità iktar effettiva.

Mart il-Prim Ministru appellat lill-pubbliku biex jattendi għal din iċ-ċelebrazzjoni mużikali fix-xenarju mill-isbaħ tal-Palazz tal-Girgenti u bil-preżenza tiegħu jkun qed jagħti sehmu fi Special Olympics u f’din is-soċjetà Maltija li qed tħares dejjem iktar favur is-saħħa mentali u l-benefiċċji li ġġib magħha.

Dr Lydia Abela temmet tgħid li bidliet żgħar jistgħu jħallu impatt kbir mhux biss fuq l-individwu iżda anke fuq il-familji tagħhom.

Intant, il-Kap Eżekuttiv tal-Orkestra Filarmonika ta’ Malta Vanessa Mangion qalet li, bħala istituzzjoni nazzjonali b’reputazzjoni għolja, huwa ta’ sodisfazzjon li l-Orkestra tkompli turi l-impenn tagħha lejn is-soċjetà, bis-sehem tagħha f’attivitajiet filantropiċi, din id-darba b’repertorju sabiħ għal gosti ta’ kulħadd. 

Il-Maestro Aurelio Belli spjega kif l-attività se tinkludi xogħlijiet mużikali ikoniċi minn films u musicals rinomati, interpretati mill-Orkestra Filarmonika ta’ Malta li hija versatili biex twassal siltiet sinfoniċi, klassiċi, rock u iktar.

Il-biljetti jistgħu jinkisbu mingħajr ħlas minn https://anightatthepalace.com/.