Month: November 2024

Il-Ġimgħa filgħodu, fil-Berġa ta’ Kastilja ġie ffirmat l-aqwa ftehim kollettiv għall-ħaddiema tas-Servizz Pubbliku li minnu se jgawdu 33,000 ħaddiem permezz ta’ żidiet sostanzjali fil-pagi u titjib qawwi fil-kundizzjonijiet. Dan il-ftehim jagħti żidiet apparti dak li diġà ngħataw ħaddiema tas-Servizz Pubbliku fuq livell settorjali.

Dan il-ftehim jidħol fis-seħħ mill-bidu tas-sena d-dieħla sas-sena 2030 u se jiġu investiti għalih €1.270 biljun, hekk kif ikopri żidiet fil-pagi, żidiet f’allowances ġodda u l-introduzzjoni ta’ allowances oħrajn. Permezz ta’ dan il-ftehim ukoll, l-impjegati li mhumiex fuq il-massimu tal-iskala rispettiva tagħhom ikunu intitolati wkoll għall-increments. Filwaqt li l-inqas skala tal-Gvern kienet €500 fuq il-paga minima, issa permezz ta’ dan il-ftehim ġiet €1,200 ’il fuq mill-paga minima.

Fid-diskors tiegħu, il-Prim Ministru Robert Abela sostna kif dan il-ftehim jibni fuq iż-żidiet u l-investiment qawwi fil-ħaddiema tas-Servizz Pubbliku permezz ta’ ftehimiet settorjali li diġà ġew iffirmati fl-aħħar xhur u snin, fosthom mal-edukaturi, l-infermiera u l-qwiebel, il-Pulizija u l-ħaddiema tal-Protezzjoni Ċivili.

“Dan huwa Gvern li jwettaq. Mhux li jehda fil-kliem u d-diskorsi. Iżda li jaħdem biex jieħu d-deċiżjonijiet li jbiddlu għall-aħjar il-kwalità tal-ħajja tal-Għawdxin u l-Maltin kollha. Ħidma importanti li saret biex wasalna għal dan il-ftehim mal-ħaddiema tas-Servizz Pubbliku li dejjem kienu hemm fil-mument tal-prova,” tenna l-Prim Ministru, li għal darb’oħra rrimarka kif dan il-ftehim ta’ investiment fil-ħaddiema huwa possibbli grazzi għall-ekonomija b’saħħitha li għandu pajjiżna.

Dr Abela sostna kif is-Servizz Pubbliku huwa mutur biex nibqgħu noffru s-servizzi kollha li nagħtu bħala Gvern għan-nies u b’hekk se jkun pedina importanti fit-twettiq tal-Viżjoni Malta 2050 fejn irridu naraw qabża fil-kwalità f’tant oqsma kruċjali.

Il-Kap tas-Servizz Pubbliku Tony Sultana qal illi l-ftehim li ġie ffirmat illum mhux se jkun qed jieħu post il-ftehimiet settorjali diġà ffirmati imma se jkun qed jikkumplimentahom. “Dan huwa ftehim li se jkun qed idaħħal kunċetti ġodda bħall-introduzzjoni tal-Long Service Bonus, kif ukoll żidiet bla preċedent fis-salarji, allowances u rata ta’ ħlas ta’ overtime,” qal Sultana.

Żied isostni li dan il-ftehim qed iħares lil hinn mill-aspett finanzjarju b’enfasi prattika fuq il-bilanċ tal-impjegati bejn ix-xogħol u l-ħajja personali, is-saħħa mentali u inizjattivi sostenibbli. Il-Kap tas-Servizz Pubbliku temm jgħid li għall-ħaddiema tas-Servizz Pubbliku dan huwa mument storiku biex inkomplu intejbu, inbiddlu u nimmodernizzaw lis-Servizz Pubbliku sabiex nagħtu servizz dejjem aħjar u ta’ aktar kwalità għall-ġid ta’ pajjiżna.

Flimkien mal-Prim Ministru u l-Kap tas-Servizz Pubbliku, attendew ukoll is-Segretarju Permanenti fi ħdan l-Uffiċċju tal-Prim Ministru Joyce Cassar, flimkien mat-tmexxija tal-għaxar unjins involuti f’dan il-ftehim

Il-Prim Ministru Robert Abela inawgura l-proġett ta’ riġenerazzjoni ta’ Ġnien Spencer fil-Marsa. Ġnien Spencer, żona ta’ madwar 11-il tomna ta’ art, irritornat fi stat mill-isbaħ lill-komunità bħala parti mill-impenn tal-Gvern li jkompli jinvesti fi spazji ħodor u sostenibbli fil-qalba tal-lokalitajiet ta’ pajjiżna.

Fil-fatt, dan il-ġnien riġenerat mill-Awtorità għall-Ambjent u r-Riżorsi, l-ERA, jippromwovi b’mod b’saħħtu l-prinċipju tas-sostenibbiltà fosthom b’sistema tal-ħażna tal-ilma u li fl-istess ħin tiffiltrah. Dan flimkien mat-tħawwil ta’ qrib is-sitt elef arbuxell u sitt elef pjanta oħra flimkien ma’ bosta siġar u sistemi li jiġġeneraw l-elettriku mid-dawl tax-xemx.

Fid-diskors tiegħu, il-Prim Ministru rrimarka s-sodisfazzjon tiegħu għat-tlestija ta’ dan il-proġett fil-qalba tal-Marsa. “Illejla qed nassistu għat-tlestija ta’ proġett f’lokalità li nemmen bis-saħħa fil-potenzjal tagħha. Lokalità li deċiżjonijiet tal-passat kienu iebsa mal-poplu Marsa. Illum kburi bi Gvern li jemmen bis-saħħa fil-Marsa”, irrimarka l-Prim Ministru hekk kif tenna mill-ġdid ir-riġenerazzjoni b’saħħitha li jrid jara f’din il-lokalità u d-deċiżjonijiet importanti li diġà ttieħdu mill-Gvern f’dan ir-rigward, fosthom bl-għeluq tal-power station.

Intant, il-Prim Ministru tenna l-impenn tiegħu li l-Gvern ikompli jagħti prijorità lil proġetti bħal dak ta’ Ġnien Spencer. “Nemmen li rridu naċċelleraw iżjed il-ħidma biex ikollna aktar. Irrid nara aktar bħal Ġnien Spencer. Proġetti oħra li wettaqna bħal dak ta’ Wied Fulija, il-Qortin f’Għawdex u Bengħajsa huma proġetti importanti”, sostna l-Prim Ministru hekk kif spjega wkoll li fil-Budget għas-sena d-dieħla se jiżdied l-investiment biex s-sena d-dieħla jitlestew 19-il proġett ieħor ta’ spazji miftuħa.

“Inħares ’il quddiem biex nara ħafna familji jgawdu dan il-post. Ejja ħalli nibqgħu nżommu dan ir-ritmu b’saħħtu fl-implimentazzjoni ta’ proġetti ambjentali lejn pajjiż ta’ kwalità”, temm jgħid il-Prim Ministru.

Qabel l-inawgurazzjoni tkellmet il-Ministru għall-Ambjent, l-Enerġija u l-Indafa Pubblika Miriam Dalli. “B’dan il-proġett ta’ riġenerazzjoni qed nagħtu nifs ġdid lill-Marsa. Dan il-proġett jissimbolizza l-protezzjoni kontinwa li rridu nagħtu lill-ambjent ta’ madwarna. Ġnien Spencer jirrappreżenta l-impenn tal-ERA li tkompli taħdem u ssaħħaħ il-ħidma tagħha favur il-protezzjoni ambjentali, fil-forom differenti tagħha,” qalet il-Ministru Dalli. “Wegħedna 40,000 metru kwadru ta’ spazji ġodda miftuħa sal-aħħar tas-sena. Dan huwa t-tielet ġnien li qed niftħu f’temp ta’ tlett ijiem. It-tielet ġnien li qed joffri valur miżjud fil-lokalità li jinsab fiha”, temmet tgħid il-Ministru Miriam Dalli.

Il-Prim Ministru Robert Abela jinawgura l-proġett tar-riġenerazzjoni tal-Bank of Valletta Centre

“Dan il-proġett huwa pass kruċjali lejn it-tisħiħ tal-istandards fl-effiċjenza fl-enerġija. Din hija l-mentalità li nemmen fiha. L-enfasi lejn is-sostenibbiltà li tagħti kwalità.” Kien b’dan il-mod li l-Prim Ministru Robert Abela ddeskriva l-proġett ta’ riġenerazzjoni tal-Bank of Valletta Centre, f’Santa Venera, waqt l-inawgurazzjoni fejn matulha Dr Abela kellu l-opportunità wkoll li jiltaqa’ mat-tmexxija tal-istess Bank u jdur l-investiment li sar.

Fl-indirizz tiegħu, il-prim ministru spjega l-importanza ta’ proġetti ta’ dan it-tip u għalhekk ir-responsabbiltà li għandu s-settur finanzjarju biex ikun katalist b’finanzjament lejn il-qalba ekoloġika. “Insaqsi – il-kundizzjonijiet li bank jagħti f’self għal xi ħadd li qed jibni blokka appartamenti mingħajr enfasi lejn l-effiċjenza fl-enerġija, dawn għandhom ikunu l-istess għal xi ħadd li qed jibni l-istess blokka b’ħarsien u attenzjoni għall-effiċjenza fl-enerġija?,” sostna l-prim ministru.

Intant, il-Prim Ministru Robert Abela għamel aċċenn għad-direzzjoni lejn il-kwalità, li qed jagħti l-Budget li tħabbar għas-sena d-dieħla. Dan fost oħrajn ukoll bid-deċiżjoni tal-gvern li jikkontribwixxi fil-pensjoni privata tal-ħaddiema tiegħu. “Din hija miżura li se tfisser opportunità tad-deheb biex f’pajjiżna nespandu niċċa finanzjarja li ħloqna bħala gvern sa mill-2016, – in-niċċa tal-pensjonijiet privati. Niċċa li barra li se twassal għal dħul akbar għall-ħaddiema tagħna meta jirtiraw, tfisser ukoll li se noħolqu fondi kbar ta’ tfaddil għat-tul li jistgħu jiġu investiti għall-progress ta’ pajjiżna,” sostna Dr Abela hekk kif spjega li dan se jkompli jagħmilha possibbli biex pajjiżna jiffoka aktar fuq il-kwalità tal-investiment u b’hekk futur sostenibbli.

Hekk kif temm id-diskors tiegħu, il-prim ministru mill-ġdid esprima s-sodisfazzjon tiegħu għal dan l-investiment propju fil-ħamsin sena anniversarju tal-Bank. “Dik il-fiduċja llum għadha hemm u b’saħħitha f’bank Malti serju. Awguri mhux biss għal ħamsin sena oħra ta’ servizz u xogħol fis-settur finanzjarju iżda għal aktar snin ta’ ħidma. Ħidma li ħafna minnha propju titwieled minn din il-bażi riġenerata li qed ninawguraw illum”, temm jgħid Dr Abela.

Waqt iċ-ċerimonja tal-inawgurazzjoni, indirizza wkoll lil dawk preżenti l-Kap Eżekuttiv tal-Bank Kenneth Farrugia li rringrazzja lill-impjegati li matul dawn is-sentejn u nofs li dam għaddej il-proġett, ikkollaboraw sabiex l-operat tal-Bank seta’ jibqa’ għaddej mingħajr xkiel. Spjega wkoll li llum kważi 40% tal-impjegati jistgħu jaħdmu b’mod remot mhux bilfors mill-uffiċċju. Min-naħa tiegħu, iċ-Chairman tal-BOV Gordon Cordina tenna li dan l-investiment jirrifletti l-impenn tal-Bank li mhux biss iħares lura lejn l-istorja ta’ suċċess, iżda jimpenja ruħu li jkompli jiġġedded u jaddatta għall-ħtiġijiet dejjem jevolvu tas-settur finanzjarju.

F’laqgħa fil-Berġa ta’ Kastilja mal-President-elett tal-Kunsill Ewropew António Costa, il-Prim Ministru Robert Abela tkellem dwar diversi temi ta’ interessi komuni għal Malta u għall-Unjoni Ewropea. 

Il-Prim Ministru Malti saħaq dwar il-ħtieġa li nkomplu naħdmu għal Suq Waħdieni li jaħdem għal kulħadd sabiex insaħħu l-kompetittività tal-Unjoni Ewropea. Huwa qal li għandu jiġi assigurat aċċess ugwali għal kull Stat Membru, u semma kif setturi kruċjali bħal dak tal-farmaċewtika u tal-merkanzija għadhom jaffaċċjaw ostakli li jipprevjenu li l-għanijiet tas-Suq Waħdieni jilħqu l-potenzjal massimu tiegħu. Il-Prim Ministru Robert Abela qal li Malta hija impattata b’dan u għalhekk bħala pajjiż nisħqu kontra l-politika ta’ “one-size-fits-all”. Dr Abela spjega kif f’kuntest ta’ qalbiet diġitali u ambjentali rridu nsaħħu l-politika tal-inċentiv biex inkomplu nimbuttaw lejn l-innovazzjoni u tkabbir ta’ kwalità fost l-intrapriżi żgħar u medji, li huma s-sinsla tal-ekonomija.

Fil-laqgħa ma’ Costa, li mistenni jibda t-terminu tiegħu bħala President tal-Kunsill Ewropew mill-1 ta’ Diċembru 2024, il-Prim Ministru Robert Abela qajjem ukoll it-tema tal-immigrazzjoni u l-importanza li tkompli l-koperazzjoni ma’ pajjiżi fl-Afrika ta’ Fuq, b’mod partikolari mal-Libja. Huwa saħaq li bħala Unjoni Ewropea rridu soluzzjonijiet innovattivi u sostenibbli sabiex jiġi assigurat li filwaqt li tingħata l-protezzjoni lil min ħaqqu,  dawk li ma ħaqqhomx l-ażil ikunu rritornati lejn il-pajjiż tal-oriġinu b’mod effettiv.

Matul il-laqgħa ġie diskuss ukoll l-irwol tal-Unjoni Ewropea fil-gwerra tal-Lvant Nofsani, fejn il-Prim Ministru Robert Abela tenna li fuq livell Ewropew irridu nibqgħu naħdmu lejn is-soluzzjoni ta’ żewġ stati li tiggarantixxi stabbiltà u paċi. Dwar is-sitwazzjoni fl-Ukrajna, qal li rridu nibqgħu naħdmu attivament għall-paċi u fl-istess ħin inħarsu lejn ir-rikostruzzjoni ta’ dan il-pajjiż. Huwa spjega li Malta qed taħdem fuq inizjattivi li jagħtu mill-ġdid il-ħajja f’komunitajiet permezz anki ta’ proġetti soċjali. Fl-isfond tal-eżitu tal-elezzjoni fl-Istati Uniti, il-Prim Ministru Malti saħaq li l-Unjoni Ewropea għandha tara li ssaħħaħ ir-relazzjoni transatlantika li tibqa’ kruċjali għall-paċi u l-istabbiltà madwar id-dinja.

Matul iż-żjara tiegħu f’pajjiżna, il-President-elett tal-Kunsill Ewropew António Costa żar ukoll flimkien mal-Prim Ministru Robert Abela l-ewwel Spazju Internazzjonali għall-Arti Kontemporanja ta’ Malta, il-MICAS, fil-Florjana u l-Kon-Katidral ta’ San Ġwann. Dr Abela awgura lil Costa għall-ħidma bit-tmexxija tal-Kunsill Ewropew u sostna li jħares ’il quddiem għal koperazzjoni b’saħħitha sabiex il-Kunsill Ewropew ikompli jiffaċilita diskussjonijiet importanti li jolqtu l-ħajja tan-nies u jibqa’ jipprovdi gwida politika effettiva li tindirizza l-isfidi komuni għaċ-ċittadini u n-negozji tagħna.