Month: March 2023

PR230397

Il-Gvern jirreferi għall-istqarrija ta’ Steward Malta iktar kmieni llum li ddeċidew li jabbandunaw l-operat tal-isptarijiet. Fiċ-ċirkostanzi l-Awtoritajiet tas-Saħħa jinsabu f’pożizzjoni li b’mod immedjat joperaw l-isptarijiet inkwistjoni.

B’hekk il-Gvern jerġa’ jserraħ ras l-impjegati li x-xogħol tagħhom huwa garantit. Il-Gvern jagħti wkoll assigurazzjoni li ċ-ċittadini, inkluż lill-pazjenti, se jibqgħu jirċievu servizz tas-saħħa tal-ogħla livell li pajjiżna magħruf għalih.

Il-Gvern jiddikjara li ma jaqbilx bl-aktar mod assolut mar-raġunijiet li ngħataw minn Steward għall-abbandun u wisq anqas mat-talbiet li qed isiru u se jkun qed iwieġeb dwar dan fil-fora adattata fl-aqwa interess nazzjonali.

PR230391

​Il-Prim Ministru Robert Abela żar id-dar tal-anzjani The Imperial f’Tas-Sliema, proġett b’investiment ta’ €30 miljun u li nfetaħ sentejn ilu minn St. George’s Care Ltd. Illum din il-kumpanija, li għandha dar oħra tal-anzjani, tħaddem mal-250 ħaddiem u toffri standards għoljin u kura ġenwina għall-anzjani.

Fiż-żjara tiegħu, il-Prim Ministru seta’ jinnota numru ta’ servizzi tal-ogħla kwalità mogħtija f’din id-dar filwaqt li ltaqa’ mal-ħaddiema u r-residenti anzjani. It-tmexxija tad-dar spjegat kif id-dar toffri faċilitajiet differenti f’kumpless li jinkludi 6,000 metru kwadru ta’ żoni komunali. Fid-dar hemm pixxina, gym, swali, kamra għall-attivitajiet u librerija fost oħrajn, biex jaqdu l-ħtiġijiet tar-residenti li jibqgħu jħossuhom parti minn komunità.

Il-Prim Ministru Robert Abela rringrazzja lit-tmexxija ta’ The Imperial u anki lill-ħaddiema tas-servizz li qed jagħtu lill-anzjani. Saħaq li l-gvern jibqa’ jappoġġja dan it-tip ta’ investiment li jżomm anki l-ogħla standards fid-djar tal-anzjani.

Irrimarka li dar bħalma hi The Imperial qed tindirizza wkoll ħtiġijiet speċifiċi għall-anzjani hekk kif din id-dar b’176 kamra, għandha taqsima għall-persuni bid-dimensja, li wkoll qed jingħataw servizz dinjituż li bih jibqa’ jkollhom kwalità ta’ ħajja aħjar. Il-Prim Ministru Robert Abela sostna wkoll fuq l-importanza tal-anzjanità attiva mhux biss fost l-anzjani li jgħixu fl-ibliet u l-irħula iżda anki dawk residenti fi djar tal-anzjani.

Min-naħa tiegħu, iċ-Chairman ta’ St. George’s Care Ltd Edward Vella, irringrazzja lill-Prim Ministru Robert Abela talli għoġbu jżur id-dar u rrimarka li l-kumpanija tistinka biex tagħti l-aqwa kura, imħabba u kwalità ta’ ħajja lir-residenti. Qal li hu ta’ sodisfazzjon kbir għalih u t-tmexxija tad-dar, li jaraw lir-residenti kuntenti jgħixu l-ħajja fil-milja tagħha.

Jakkumpanja lill-Prim Ministru tul iż-żjara f’The Imperial kien hemm il-Ministru għall-Anzjanità Attiva Jo Etienne Abela.

PR230373

Il-Prim Ministru jiltaqa’ mal-bdiewa

Fiż-żona tal-Fiddien fir-Rabat, il-Prim Ministru Robert Abela ltaqa’ ma’ numru ta’ bdiewa li minn kmieni filgħodu kienu qed jaħdmu r-raba’ tagħhom. 

Il-Prim Ministru tkellem dwar kif meta tinżel man-nies fuq il-post tax-xogħol tifhem il-ħtiġijiet tagħhom u anke x’bidliet għandhom jiġu implimentati biex il-kundizzjonijiet tagħhom jissaħħu. 

F’dan il-kuntest, il-Prim Ministru nnota wkoll kif l-għajnuna finanzjarja li offra l-Gvern matul is-snin qed tkun ta’ sostenn prattiku għall-bdiewa. Dan fost riformi oħra fis-settur, li saru fl-ewwel sena ta’ din il-leġiżlatura, fosthom ir-riforma fil-liġijiet tal-qbiela. 

Wiġi Sant, bidwi b’iżjed minn 50 sena esperjenza, kien akkumpanjat mill-familja tiegħu u ta spjega dettaljata tax-xogħol li jagħmlu ta’ kuljum. Huwa sostna li l-għajnuna li qed tingħata mill-Gvern lill-bdiewa hija ta’ importanza kbira, filwaqt li rrikonoxxa li anke fi sfond ta’ pandemija u ta’ sfidi internazzjonali minħabba l-gwerra fl-Ukrajna, il-Gvern baqa’ jinvesti f’dan is-settur. 

Preżenti għaż-żjara kien hemm il-Ministru għall-Agrikoltura, is-Sajd u d-Drittijiet tal-Annimali Anton Refalo.

Fil-Berġa ta’ Kastilja, il-Prim Ministru Robert Abela ltaqa’ mal-grupp The Busker, li rebaħ il-Malta Eurovision Song Contest u għalhekk se jkun qed jirrappreżenta lill-pajjiżna fil-Eurovision Song Contest f’Mejju li ġej, f’Liverpool. F’laqgħa oħra ltaqa’ maż-żagħżugħ Kyran Bonello, ir-rebbieħ ta’ Malta’s Got Talent. Ma’ dawn l-artisti żgħażagħ, il-prim ministru tkellem dwar opportunitajiet sbieħ fix-xena tal-ispettaklu u filwaqt li rrikonoxxa t-talenti tagħhom, awguralhom għall-futur.