Malta użat b’suċċess mija fil-mija tal-fondi Ewropej allokati għaliha għall-perjodu 2013-2020, liema perjodu teknikament għalaq f’Diċembru li għadda.

Ħabbar dan il-Prim Ministru Robert Abela meta fl-inawgurazzjoni tal-Palazz tal-Gran Mastru kien qed jitkellem dwar l-użu tal-fondi Ewropej.

Il-Prim Ministru tenna li dan jawgura tajjeb għall-perjodu li ninsabu fih wara li l-Gvern preżenti nnegozja l-ikbar pakkett ta’ fondi Ewropej għal pajjiżna u b’hekk Malta issa għandha d-doppju tal-fondi Ewropej li kellha qabel x’tuża.

Meta kienu għaddejjin in-negozjati dwar il-pakkett ta’ fondi għall-perjodu kurrenti, il-Gvern ma waqafx bil-ħidma biex jinvesti l-pakkett ta’ fondi Ewropej li kellu għad-dispożizzjoni tiegħu. B’dawn il-fondi issa ġew assorbiti kollha għall-benefiċċju taċ-ċittadini Maltin u Għawdxin.

Il-€1.1 biljun għall-perjodu 2013-2020 kienu investiti fi proġetti kapitali, proġetti soċjali u programmi oħra.

Fosthom bl-investiment ta’ €925.5 miljun, saru 128 investiment jew proġett li l-mira tagħhom kienet li tagħmel l-ekonomija tagħna mhux biss aktar kompetittiva iżda anke innovattiva.

Fost dawn kien hemm il-fondi ta’ koeżjoni li bihom saru investimenti infrastrutturali fl-edukazzjoni, fis-saħħa, fil-kultura u l-innovazzjoni, fl-enerġija rinnovabbli u l-kompetittività. Ma’ dawn jiżdiedu investimenti li saru fl-infrastruttura marittima u tat-toroq tagħna, flimkien ma’ fondi oħra li ġew allokati biex nimmitigaw l-impatti tal-pandemija, kif proprju għamilna b’suċċess. Bl-investiment f’dawn l-oqsma laħaq is-€673 miljun.

Dan filwaqt li madwar €280 miljun il-Gvern investihom f’prijoritajiet aktar soċjali u fil-ħiliet, biex ngħinu aktar nies jibnu fuq il-kapaċitajiet tagħhom, isibu xogħol aħjar filwaqt li ntejbu l-ħidma tal-istituzzjonijiet tagħna. F’dan il-qasam biss, saru 54 proġett, tliet skemi maġġuri u strument finanzjarju fil-qasam tal-edukazzjoni.

Hu stmat li ftit inqas minn 150,000 persuna bbenefikaw minn opportunitajiet jew proġetti li saru b’dan il-fond madwar Malta u Għawdex. B’dawn ma jinkludux proġetti u ħidma li kienet għaddejja fl-aħħar snin bil-fondi ta’ rkupru u reżiljenza.

Il-kumplament tal-fondi kien finanzjament lejn programmi bħal Erasmus u inizjattivi oħra.

Il-Prim Ministru tenna l-impenn tal-Gvern li filwaqt li jkompli jaħsad l-opportunitajiet għal pajjiżna, ikompli jinvesti fin-nies u jwettaq aktar ħidma għall-poplu Malti u Għawdxi.