Il-Prim Ministru Robert Abela u martu Dr Lydia Abela se jkunu qed jilqgħu lill-pubbliku fil-Berġa ta’ Kastilja nhar l-Erbgħa 20 ta’ Diċembru bejn l-4:00pm u l-5:30pm, għall-awguri tal-festi tal-Milied u tas-Sena l-Ġdida.

Dan qed jitħabbar illum, fil-jum li wieħed jista’ jmur u jpoġġi rigal taħt is-siġra tal-Milied fi Pjazza Kastilja bħala parti mill-inizjattiva ‘Rigal bi Mħabba’. Ir-rigali taħt is-siġra tal-Milied fi Pjazza Kastilja se jkunu jistgħu jibqgħu jitpoġġew sal-21 ta’ Diċembru, fejn dakinhar jintlaħaq il-qofol bl-għeluq tar-raba’ edizzjoni ta’ ‘Rigal bi Mħabba’.

Dakinhar u lejliet, fl-20 ta’ Diċembru, jiġifieri dakinhar li l-Prim Ministru Robert Abela u martu Dr Lydia Abela se jilqgħu lill-pubbliku għall-awguri tal-festi, fi Pjazza Kastilja se jittella’ Villaġġ tal-Milied. Propju fl-20 ta’ Diċembru se jittella’ kunċert mill-banda tal-Forzi Armati ta’ Malta.

Kull min jixtieq jiltaqa’ mal-Prim Ministru u ma’ Dr Lydia Abela fl-20 ta’ Diċembru huwa mitlub jirreġistra d-dettalji tiegħu fuq 22002400/1.