Iħabbar passi importanti fis-settur tal-enerġija b’diskussjoni parlamentari l-ġimgħa d-dieħla  

Fil-Berġa ta’ Kastilja, il-Prim Ministru Robert Abela ddiskuta maż-żgħażagħ diversi suġġetti ta’ importanza nazzjonali. Fost is-suġġetti li tkellmu dwarhom kien hemm l-enerġija rinnovabbli, l-ambjent, in-nisa fil-politika, l-ippjanar u t-turiżmu fost l-oħrajn.

Meta kien qed jitkellem dwar sorsi alternattivi ta’ enerġija, il-Prim Ministru Robert Abela ħabbar li bil-għan li pajjiżna jibqa’ jiddiversifika s-sorsi ta’ enerġija tiegħu għal arja iktar nadifa u biex jintlaħqu l-miri tal-Unjoni Ewropea dwar l-enerġija nadifa, se tkun qed tinħareġ sejħa pubblika internazzjonali għal turbini tar-riħ u pannelli solari fuq il-baħar.

Dan flimkien mat-tieni interconnector u l-ftehim ta’ koperazzjoni konġunta mal-Libja dwar interconnector bi provvista ta’ enerġija rinnovabbli. 

Il-Prim Ministru Abela saħaq li l-ġimgħa d-dieħla l-Parlament se jiddiskuti l-Att fejn se nistabbilixxu żoni li jiffurmaw iż-Żoni Ekonomiċi Esklussivi, jiġifieri żoni barra mill-ibħra territorjali fejn pajjiżna jkollu ġurisdizzjoni fuqhom.

Dr Abela spjega li għal dawn iż-żoni mbagħad pajjiżna se joħroġ is-sejħiet pubbliċi għal ġenerazzjoni ta’ enerġija rinnovabbli.

Matul il-laqgħa tqajmu diversi suġġetti oħra miż-żgħażagħ li huma kandidati prospettivi għat-twaqqif tal-ewwel Youth Advisory Forum, fosthom is-saħħa mentali, l-ugwaljanza bejn is-sessi, l-intelliġenza artifiċjali, drittijiet ċivili u l-ippjanar.

Dwar din tal-aħħar, il-Prim Ministru saħaq li bit-twaqqif tal-Awtorità tal-Bini u l-Kostruzzjoni, il-BCA, qed jiddaħħlu standards ġodda kif ukoll iktar infurzar, filwaqt li għall-ewwel darba qed tkun implimentata r-riforma tal-liċenzjar tal-kuntratturi. Kwistjonijiet oħrajn li tqajmu trattaw fost oħrajn riformi ġudizzjarji, it-trasport u l-anzjani.

Il-Prim Ministru Robert Abela rringrazzja liż-żgħażagħ talli ħadu l-ewwel pass u ssottomettew l-applikazzjoni tagħhom għall-Youth Advisory Forum filwaqt li saħaq li r-rieda tal-gvern u tagħhom li jaraw lil Malta miexja ‘l quddiem, tgħaqqadhom ilkoll flimkien.

Din il-laqgħa serviet ta’ opportunità għall-applikanti tal-Youth Advisory Forum li għandhom bejn is-sittax u l-ħamsa u tletin sena, li jsemmgħu leħinhom u jaqsmu l-aspirazzjonijiet tagħhom dwar Malta.

Eventwalment se jintgħażlu tmien applikanti biex flimkien mar-rappreżentanta tal-Kunsill Nazzjonali taż-Żgħażagħ, Michaela Vassallo, jiffurmaw l-ewwel grupp tal-Youth Advisory Forum.

Ladarba jintgħażlu l-membri minn Kumitat tal-Għażla flimkien mal-Kunsill Nazzjonali taż-Żgħażagħ, il-Youth Advisory Forum jibda jkollu laqgħat regolari mal-Prim Ministru għal terminu ta’ tmintax-il xahar li matulhom jagħtu pariri lill-gvern fuq liġijiet, strateġiji u pjanijiet li jkunu qed jiġu diskussi lokalment jew fuq livell internazzjonali.

Preżenti għal din il-laqgħa kien hemm ukoll il-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni Clifton Grima, is-Segretarju Parlamentari għaż-Żgħażagħ, ir-Riċerka u l-Innovazzjoni Keith Azzopardi Tanti, is-Segretarju Parlamentari għad-Djalogu Soċjali Andy Ellul u l-Kunsill Nazzjonali taż-Żgħażagħ.​​