STQARRIJA MILL-GVERN TA’ MALTA

PR221392

14/10/2022

Il-Prim Ministru Robert Abela jinnota s-sentenza tal-Qorti Kriminali li ngħatat illum u li permezz tagħha żewġ persuni oħra ġew misjuba ħatja għall-omiċidju ta’ Daphne Caruana Galizia, u kkundannati għal erbgħin sena priġunerija kull wieħed.

Dan hu pass importanti ieħor lejn ġustizzja f’dan il-każ, li hu tebgħa sewda fl-istorja ta’ pajjiżna.

Wara s-sentenza tal-lum, issa hemm tliet persuni misjuba ħatja u kkundannati b’piena ta’ priġunerija dwar dan il-qtil. Filwaqt li tliet persuni oħra għad irid jibda l-ġuri tagħhom.

Il-prim ministru jerġa’ jtenni l-impenn ċar tal-gvern li jkun hemm ġustizzja mal-familja Caruana Galizia u mal-poplu kollu.

Il-prim ministru jrodd ħajr lill-awtoritajiet kollha li ħadmu u qed ikomplu jaħdmu bil-għan li ssir ġustizzja sħiħa f’dan il-każ.

Awtoritajiet, li se jibqgħu jsibu lill-gvern ta’ sostenn fil-ħidma tagħhom.

Fl-istess ħin il-gvern se jkompli ukoll b’riformi importanti li jsaħħu s-saltna tad-dritt u l-qafas demokratiku ta’ pajjiżna.

FacebookTwitter