STQARRIJA MILL-UFFIĊĊJU TAL-PRIM MINISTRU

PR221203

19/09/2022

Konferenza tan-Nazzjonijiet Uniti fi New York: il-Prim Ministru Robert Abela jagħti viżibilità tal-EuroPride f’Malta għas-sena d-dieħla

F’indirizz li għamel fl-LGBTI Core Group, grupp reġjonali tan-Nazzjonijiet Uniti, il-Prim Ministru Robert Abela saħaq li Malta qed tħares ’il quddiem biex tilqa’ bosta nies minn madwar id-dinja fil-EuroPride li se tkun organizzata bejn is-7 u s-17 ta’ Settembru ta’ sena oħra.

Hu u jindirizza diskussjoni forma ta’ konferenza marbuta mas-77 sessjoni tal-Assemblea Ġenerali tan-Nazzjonijiet Uniti fi New York, il-Prim Ministru Abela spjega li fl-2013, Malta kienet fit-18-il post tal-indiċi ILGA-Europe b’punteġġ ta’ 35% iżda llum pajjiżna jinsab fl-ewwel post b’punteġġ ta’ 92%.

“Iċ-ċaqliq fil-politika u l-liġijiet favur aktar ugwaljanza fost persuni LGBTIQ sar riżultat ta’ ħidma u sħubija bejn il-gvern u s-soċjetà ċivili”, spjega l-Prim Ministru Robert Abela.

Fid-diskussjoni bit-tema ‘The Right to Be Me’, il-Prim Ministru Abela saħaq li pajjiżna għamel qabżiet kbar u Malta hija onorata li llum qed isservi ta’ mudell għal pajjiżi oħra.

F’kuntest dinji, il-prim ministru Malti saħaq li fadal x’naqdfu biex persuni LGBTIQ madwar id-dinja jgawdu minn drittijiet ċivili.

Hawn semma l-ħtieġa li persuni LGBTIQ ikollhom id-dinjità u d-drittijiet fundamentali tagħhom imħarsa.

Filwaqt li spjega kif fil-EuroPride ta’ sena oħra f’pajjiżna se jkun hemm għadd ta’ attivitajiet fosthom konferenzi u laqgħat ta’ appoġġ għall-komunità LGBTIQ, il-Prim Ministru Robert Abela saħaq li fl-aspett ta’ dawn id-drittijiet, Malta hija storja ta’ suċċess, għax semgħet ukoll il-vuċijiet ta’ kulħadd.

FacebookTwitter