STQARRIJA MILL-UFFIĊĊJU TAL-PRIM MINISTRU

PR220678

21/05/2022

Il-Gvern se jkun qed jassisti lill-pubblikaturi tal-gazzetti fi żmien fejn qed jiffaċċjaw sfidi sinifikanti, riżultat taż-żieda sostanzjali fil-prezz tal-karta.

Il-Kumitat tal-Pubblikaturi kollha tal-gazzetti stampati f’pajjiżna li jimpjegaw ma’ 66 ġurnalist full-time u bosta fuq bażi part-time flimkien ma’ rappreżentanti tal-Istitut tal-Ġurnalisti Maltin (IĠM) iltaqgħu mal-Prim Ministru Robert Abela f’Kastilja biex jippreżentaw l-argumenti tagħhom u jispjegaw id-diffikultajiet kbar li qed jaffaċċjaw fid-dawl ta’ avvenimenti straordinarji. Bejniethom, l-istampaturi jippubblikaw 14-il gazzetta differenti li joħorġu l-Ħadd, kuljum jew kull ġimgħa.

Matul il-laqgħa, ġie diskuss l-irwol tal-gazzetta bħala parti essenzjali mill-midja, li hija element qawwi f’demokrazija. Huwa fid-dawl ta’ dan l-irwol kruċjali li l-Prim Ministru kkomunika li l-Gvern iħoss li għandu jsostni dan is-settur. Għalhekk ġie ddedikat fond ta’ €500,000 f’sena biex isostni l-ħidma tal-ġurnaliżmu stampat f’pajjiżna, fid-dawl taċ-ċirkostanzi straordinarji li komplew iżidu l-isfidi kbar li diġà kellu s-settur.

Għal din il-laqgħa, il-Prim Ministru kien akkumpanjat mill-Ministru għall-Finanzi u x-Xogħol Clyde Caruana u l-Ministru għall-Wirt Nazzjonali, l-Arti u l-Gvern Lokali Owen Bonnici.

FacebookTwitter